МЭДЭГДЭЛ

Монгол Улсын Үндсэн хууль, Монгол Улсын төрөөс цацраг идэвхт ашигт малтмал болон цөмийн энергийн талаар баримтлах бодлого, Засгийн газрын агентлагийн эрх зүйн байдлын тухай хууль, Төсвийн байгууллагын удирдлага, санхүүжилтийн тухай хууль, Төрийн албаны тухай хууль, Цөмийн энергийн тухай хууль болон холбогдох хууль тогтоомжийн хүрээнд Засгийн газрын тохируулагч агентлаг – Цөмийн энергийн газар нь цацраг идэвхт ашигт малтмал болон цөмийн энерги ашиглах, цөмийн технологи нэвтрүүлэх, цөмийн судалгааг хөгжүүлэх талаар төрөөс баримтлах бодлогыг хэрэгжүүлэх, цөмийн болон цацрагийн хамгаалалт, аюулгүй байдлыг хангах, мэргэжлийн хяналт тавих чиг үүргийг хэрэгжүүлж байна.

Тус агентлаг нь Цөмийн энергийн тухай хууль, Цөмийн энергийн тухай хуулийг дагаж мөрдөх журмын тухай хууль батлагдсантай холбогдуулан цацраг идэвхт ашигт малтмалын ашиглалтын болон хайгуулын тусгай зөвшөөрлийг шинэчлэн бүртгэж, олгох үйл ажиллагааг хууль тогтоомжид заасан нөхцөл, шаардлагыг хангасан аж ахуйн нэгж, хуулийн этгээдэд олгосон.

Дээрхи үйл ажиллагаатай холбогдуулан сүүлийн үед олон нийтийн мэдээллийн хэрэгслээр тус агентлаг, түүний удирдлага, холбогдох албан тушаалтны нэр төрд халдсан, тусгай зөвшөөрлийг худалдсан, авлига авсан, хууль бус олголт хийсэн тухай баримт, нотолгоогүй гүтгэлгийн шинж чанартай оролдлого ихээр хийгдэж байна.

Иймд олон нийтийн мэдээллийн хэрэгслээр тус агентлаг болон түүний удирдлага, албан тушаалтны нэр төрд халдсан, гүтгэлгийн шинж чанартай мэдээ, мэдээлэл, нийтлэлийг ард иргэд, олон нийтэд түгээх үйл ажиллагаа явуулахгүй байхыг үүгээр мэдэгдэж байна.

Тус агентлагийн үйл ажиллагаа, албан тушаалтны нэр төрд халдсан хууль бус үйлдэл гаргасан тохиолдолд шүүхийн байгууллагад хандаж, хариуцлага тооцуулахыг анхааруулж байна.

ЗАСГИЙН ГАЗРЫН ТОХИРУУЛАГЧ АГЕНТЛАГ

ЦӨМИЙН ЭНЕРГИЙН ГАЗАР