Монгол Улсын Засгийн газрын тохируулагч агентлаг Цөмийн энергийн газрын дарга С.Энхбат, Бүгд Найрамдах Франц Улсын “Арева” группийн гүйцэтгэх захирал хатагтай Анн Лувержон нар цацраг идэвхт ашигт малтмал болон цөмийн энергийг энхийн зорилгоор ашиглах салбарт хамтын ажиллагааны тухай харилцан ойлголцлын санамж бичигт 2009 оны 10 дүгээр сарын 05-ны өдөр Цөмийн энергийн газарт гарын үсэг зурлаа.

Олон Улсын атомын энергийн агентлагийн Ерөнхий бага хурлын 53 дугаар чуулган 2009 оны 9 дүгээр сарын 14-нөөс 9 дүгээр сарын 18-ны өдрүүдэд Вена хотноо болов.

Чуулганд Цөмийн энергийн газрын дарга С.Энхбат (төлөөлөгчдийн тэргүүн), Монгол Улсаас Австри Улсад суугаа Онц Бөгөөд Бүрэн Эрхт Элчин Сайд Ж.Энхсайхан (төлөөлөгчдийн дэд тэргүүн) , Эрүүл мэндийн дэд сайд Ж.Цолмон, Цөмийн энергийн газрын Цөмийн болон Цацрагийн хяналтын газрын дарга Г.Манлайжав, Хавдар судлалын үндэсний төвийн захирал Л.Төмөрбаатар, Хавдар судлалын үндэсний төвийн дэд захирал Г.Пүрэвсүрэн, Цөмийн энергийн газрын Гадаад хамтын ажиллагааны хэлтсийн мэргэжилтэн Д.Гантуяа, Байнгын төлөөлөгчийн газрын 3 дугаар нарийн бичгийн дарга А.Төмөр, Ш.Ринченмядаг нар тус тус оролцов.

Энэ удаагийн чуулганд нийт 150 орны 1400 гаруй төлөөлөгч оролцсон бөгөөд Камбожийн Вант Улс, Бүгд Найрамдах Руанда шинээр Улс Олон Улсын атомын энергийн агентлагт гишүүнээр элслээ.

Монгол Улсын Засгийн газрын тохируулагч агентлаг Цөмийн энергийн газар, Бүгд Найрамдах Энэтхэг Улсын Засгийн газрын Атомын энергийн газар цацраг идэвхт ашигт малтмал болон цөмийн энергийг энхийн зорилгоор ашиглах салбар дахь хамтын ажиллагааны тухай харилцан ойлголцлын санамж бичгийг 2009 оны 9 дүгээр сарын 14-ны өдөр байгууллаа.

Монгол Улсын Цөмийн энергийн газар, ОХУ-ын атомын энергийн “Росатом” улсын корпорацийн хооронд Уран олборлох болон атомын энергийн салбарт хамтран ажиллах тухай хэлэлцээрийг 2009 оны 8 дугаар сарын 25-нд байгууллаа.