Монгол Улсын Засгийн газрын 2008-2012 оны үйл ажиллагааны хөтөлбөрийн 2.2.4-д “Ураны судалгаа, хайгуул, олборлолт, баяжуулалтын үйл ажиллагаа явуулах эрх зүйн орчныг бүрдүүлж, баталгаажсан нөөцийг нэмэгдүүлэн, олборлолтод хөрөнгө оруулах сонирхол бүхий стратегийн хөрөнгө оруулагчтай хамтран Мардай зэрэг ураны ордуудыг ашиглаж эхэлнэ.” гэж заасан.

           Монгол Улсын Засгийн газрын 2008-2012 оны үйл ажиллагааны хөтөлбөрийн 2.2.4 заалтыг хэрэгжүүлэхийн тулд ураны үйл ажиллагааг эрхлэн явуулах төрийн өмчит компани байгуулах зайлшгүй шаардлага тулгарч байгаа юм.

           Олон улсын жишгээс үзэхэд ураны ашигт малтмалтай холбогдсон үйл ажиллагааг төрийн өмчит компани эрхэлж явуулдаг туршлага байна.

           Монгол Улсын Засгийн газрын 2009 оны 2 дугаар сарын 11-ний өдрийн 45 тоот тогтоолоор уран болон бусад төрлийн цацраг идэвхт ашигт малтмалын геологи хайгуул, олборлолтын үйл ажиллагаанд дангаар болон бусад хуулийн этгээдтэй хамтран оролцох, төрийн төлөөллийг зохих хууль тогтоомжийн дагуу хэрэгжүүлэх үүрэг бүхий “Мон-Атом” Төрийн өмчит хязгаарлагдмал хариуцлагатай компанийг  байгуулахаар баталсан.

           Төрийн Өмчийн Хорооны 2009 оны 3 дугаар сарын 12-ны өдрийн 49 тоот тогтоолоор “Мон-Атом” Төрийн өмчит хязгаарлагдмал хариуцлагатай компанийн дүрмийг баталж, “Мон-Атом” Төрийн өмчит хязгаарлагдмал хариуцлагатай компанийн Төлөөлөн удирдах зөвлөлийн даргаар Цөмийн Энергийн газрын дарга, доктор С. Энхбат, гишүүдээр Эрдэс баялаг, эрчим хүчний яамны Төрийн нарийн бичгийн дарга Д.Хүрэлбаатар, Сангийн Яамны ТБГ-ын дарга Б. Батжаргал, Цөмийн Энергийн газрын дэд дарга Ц. Дамдинсүрэн, Төрийн өмчийн хорооны даргын зөвлөх Д. Байлыхүү нарыг томилсон.

          Мөн Төрийн Өмчийн Хорооны 2009 оны 3 дугаар сарын 12-ны өдрийн 50 тоот тогтоолыг үндэслэн “Мон-Атом” Төрийн өмчит хязгаарлагдмал хариуцлагатай компанийн Төлөөлөн удирдах зөвлөлийн 2009 оны 3 дугаар сарын 12-ны өдрийн 02 тоот тогтоолоор “Мон-Атом” ХХК-ийн Гүйцэтгэх захирлаар Р. Бадамдамдин томилогдсон.

“Мон-Атом” Төрийн өмчит ХХК-ийн дүрмэнд заасны дагуу

• Монгол Улсын нутаг дэвсгэр дээр уран болон бусад цацраг идэвхт ашигт малтмалын геологийн судалгаа, хайгуул хийх,
• Цацраг идэвхт ашигт малтмалын нөөцийг тогтоож, түүнийг нэмэгдүүлэх үйл ажиллагаа явуулах,
• Цацраг идэвхт ашигт малтмалыг ашиглах үйлдвэрийн техник, эдийн засгийн үндэслэл боловсруулах, түүнийг барьж байгуулах, үйл ажиллагааг удирдах,
• Ураны хүдрийг олборлох, боловсруулах, баяжуулах үйл ажиллагааг үе шаттайгаар хэрэгжүүлэх,
• Монгол улсын болон олон улсын гэрээнд нийцүүлэн энхийн зориулалтаар ураны бүтээгдэхүүнийг экспортлох зэрэг үндсэн үйл ажиллагаануудыг явуулна.