Цацраг идэвхт ашигт малтмал-уран болон цөмийн эрчим хүчний хэрэглээ дэлхий дахинаа жилээс жилд улам өсөн нэмэгдэж байна. Ураны нөөцөөр баян Монгол Улс энэ ашигт малтмалаа олборлон эдийн засгийн их үр өгөөж хүртэх, түүнчлэн эрчим хүчний эрэлт шаардлагын зохих хувийг цөмийн эрчим хүчээр хангахыг зорьж байна. УИХ “Монгол Улсын төрөөс цацраг идэвхт ашигт малтмал болон цөмийн энергийн талаар баримтлах бодлого”-ыг 2009 оны 06 сарын 25-ны өдөр, “Цөмийн энергийн тухай хууль”-ийг 2009 оны 07 дугаар сарын 16-ны өдөр баталсан. Энэ хууль, эрх зүйн баримт бичгийн дагуу Цөмийн энергийн газар нь цацраг идэвхт ашигт малтмал болон цөмийн энерги ашиглах, цөмийн технологи нэвтрүүлэх, цөмийн судалгааг хөгжүүлэх талаар төрөөс баримтлах бодлогыг хэрэгжүүлэх, цөмийн болон цацрагийн хамгаалалт, аюулгүй байдлыг хангах, мэргэжлийн хяналт тавих чиг үүргийг хүлээж байна.

Монгол улс одоогоор тогтоогдоод буй ураны нөөцөөрөө дэлхийд 15-д бичигдэж байгаа бөгөөд урьдчилсан таамаглал илэрц нотлогдвол эхний 5-д багтах юм. Энэ нөөц баялгийнхаа үр өгөөжийг хүртэх үүднээс Монгол улсын төрөөс ураны ордуудыг эдийн засгийн эргэлтэд оруулах, экологийн хувьд цэвэр, агаарын бохирдолгүй, бага өртгөөр эрчим хүч үйлдвэрлэдэг давуу талтай атомын цахилгаан станц байгуулах зорилт тавин ажиллаж байна. Энэ зорилтыг хэрэгжүүлэхдээ ард түмнийхээ аюулгүй байдлыг бүрэн хангах, унаган байгалиа хэвээр хадгалах нь чухал билээ.

Цацраг идэвхт ашигт малтмал, цөмийн эрчим хүчний салбарт ажиллаж буй болон ажиллахыг зорьж буй гадаад дотоодын байгууллага, аж ахуйн нэгж, ард иргэдэд шаардлагатай мэдээ, мэдээллийг шуурхай хүргэх, тэдний санал бодлыг сонсох үүднээс Цөмийн энергийн газар энэхүү интернэтийн цахим хуудсыг нээлээ.

Энэ цахим хуудас орон зай, цаг хугацааг товчлон биднийг холбох гүүр болно гэдэгт итгэлтэй байна.

ЦЭГ-ын Дарга, Улсын Ерөнхий Байцаагч, ШУ-ны Доктор, Профессор С.Энхбат