Олон улсын атомын энергийн агентлаг (ОУАЭА)-аас “Цөмийн аюулгүй байдлын ирээдүй” сэдэвт эссэ бичлэгийн уралдааныг залуу эрдэмтэн, судлаачдын дунд зарлаж байна. ОУАЭА-аас “Цөмийн аюулгүй байдал: Тогтворжуулах ба бэхжүүлэх хүчин чармайлт” сэдэвт олон улсын бага хурлыг 2020 оны 02 дугаар сарын 10-14-ний өдрүүдэд Австри Улсын Вена хотноо зохион байгуулна. Хурлаар улс орнуудын цөмийн аюулгүй байдлыг бэхжүүлэх, цөмийн аюулгүй байдалд үнэлэлт, дүгнэлт өгөх, ОУАЭА-ийн цөмийн аюулгүй байдлын удирдамж, сайн туршлагуудыг дэмжих, цөмийн аюулгүй байдлын чиглэлээр хэрэгжүүлэх цаашдын арга хэмжээнүүдийг боловсронгуй болгох талаар хэлэлцэнэ. (2019-05-23 07:22:00)

Мэдээ

“Радиобиологи, цацрагийн хамгаалал” сэдэвт олон улсын эрдмийн бага хурал зохион байгуулав

Монгол Улс болон ОХУ-ын Цөмийн Шинжилгээний Нэгдсэн Институтийн Цацрагийн биологийн лабораторийн хамтын ажиллагааны хүрээнд зохион байгуулж буй “Радиобиологи, цацрагийн хамгаалал” сэдэвт ОУ-ын эрдмийн бага хурлыг Боловсрол шинжлэх ухааны яам, Цөмийн энергийн газар (ЦЭГ), ОХУ-ын Цөмийн шинжилгээний нэгдсэн институт (ЦШНИ), Шинжлэх ухаан техникийн их сургууль (ШУТИС), МУИС-ийн физик электроникийн сургууль хамтран Улаанбаатар хотноо өнгөрсөн долоо хоногт зохион байгуулав.
 
Үйл ажиллагааг нээж Цөмийн энергийн газрын дарга, Улсын Ерөнхий байцаагч Н.Тэгшбаяр илтгэл тавьсан бөгөөд тус хурлаар радиобиологи, цацрагийн хамгаалалын хүрээнд тулгамдаж байгаа асуудал, судалгаа шинжилгээний мэдээ, мэдээллийг эмч мэргэжилтэн, судлаачдад хүргэх, харилцан солилцох, ололт амжилтаа цаашид бататгах зэргийг хэлэлцлээ.
 
Хаалтын хуралдаанд ЦШНИ-ийн Цацрагийн биологийн лабораторийн захирал, академич Е.А.Красавин уригдан ирж, орчин үеийн биологи, шинжлэх ухаан, технологийн дэвшлийн олон зангилаа асуудал, радиобиологийн суурь судалгааны хөгжил, түүний үр дүнгийн талаар эмч, эрдэмтэн, судлаачидтай уулзаж харилцан мэдээлэл солилцсондоо сэтгэл ханамжтай байгаагаа илэрхийлсэн. Цаашид ЦШНИ-ийн цацрагийн биологийн лабораторийн залуу эрдэмтэн, доктор О.Белов, тус лабораторид ажиллаж буй манай залуу эрдэмтэн М.Батмөнхтэй хамтран Монгол Улсад салбар сургууль байгуулах боломжийн талаар судалгаа хийх болсныг мэдэгдэв.
 
Хурлын үеэр МУИС, ФЭС болон ЭШУИС, Био-Анагаахын сургуулийн удирдлагууд цацрагийн болон квант биологи, түүний мэдээллийн технологид суурилсан математик, тооцоо дүрслэлт туршилтын чиглэлүүдээр хамтын сургалт явуулахаар санал нэгдлээ.